పొత్తులకు, విధానాలకు సంబంధం ఉండదా!

భారత కమ్యూనిస్టు పార్టీ సిపిఐ అగ్రనేత ఎబి బర్దన్ ఒక మాట చెప్పారు. తెలుగుదేశం పార్టీతో పొత్తు పెట్టుకున్నంత మాత్రాన ఆ పార్టీ విధానాలను తాము ఆమోదించినట్లు కాదని, అలాగే ప్రత్యేక తెలంగాణను సమర్థించినంత మాత్రాన తమది టీఆర్ఎస్ భావజాలం కాదని ఆయన చెప్పారు.గత కొంతకాలంగా సిపిఐ నేతలు టిడిపి అదినేత చంద్రబాబు నాయుడుతో సాన్నిహిత్యాన్ని కొనసాగిస్తున్నారు. చంద్రబాబు నాయుడు పాదయాత్రలో ఉండగా , ఆ తర్వాత పాదయాత్ర పూర్తి చేసుకుని వచ్చాక సిపిఐ రాష్ట్ర కార్యదర్శి నారాయణ ఆయనను కలిశారు. రెండు రోజుల క్రితం బర్దన్ కూడా చంద్రబాబు కలిసి తృతియ ఫ్రంట్ గురించి చర్చించారు.అయితే వారిది ఒక చిత్రమైన పరిస్థితి ఎదురవుతోంది. టిఆర్ఎస్ తో పొత్తు పెట్టుకుందామని అనుకుంటే ఆ పార్టీ అందుకు సిద్దంగా లేదు. దాంతో కొంత నిరుత్సాహానికి గురి అయింది.ఆ మీదట టిఆర్ఎస్ పై నారాయణ మండిపడ్డారు. కాగా టిడిపితో పొత్తు పెట్టుకునే విషయంలో ఒక అడుగు ముందుకు వేసినట్లు కనిపిస్తుంది.కాకపోతే ఇప్పుడే ఆ విషయం ప్రకటించకుండా ఎన్నికల సమయంలోనే పొత్తులు ఉంటాయని నారాయణ కూడా అన్నారు.అయితే ఎందుకైనా మంచిదని పొత్తులకు , పార్టీల విధానాలకు సంబందం లేదని సిపిఐ నేతలు సూత్రీకరిస్తున్నారు.