భారత కమ్యూనిస్టు పార్టీ సిపిఐ అగ్రనేత ఎబి బర్దన్ ఒక మాట చెప్పారు. తెలుగుదేశం పార్టీతో పొత్తు పెట్టుకున్నంత మాత్రాన ఆ పార్టీ విధానాలను తాము ఆమోదించినట్లు కాదని, అలాగే ప్రత్యేక తెలంగాణను సమర్థించినంత మాత్రాన తమది టీఆర్ఎస్ భావజాలం కాదని ఆయన చెప్పారు.గత కొంతకాలంగా సిపిఐ నేతలు టిడిపి అదినేత చంద్రబాబు నాయుడుతో సాన్నిహిత్యాన్ని కొనసాగిస్తున్నారు. చంద్రబాబు నాయుడు పాదయాత్రలో ఉండగా , ఆ తర్వాత పాదయాత్ర పూర్తి చేసుకుని వచ్చాక సిపిఐ రాష్ట్ర కార్యదర్శి నారాయణ ఆయనను కలిశారు. రెండు రోజుల క్రితం బర్దన్ కూడా చంద్రబాబు కలిసి తృతియ ఫ్రంట్ గురించి చర్చించారు.అయితే వారిది ఒక చిత్రమైన పరిస్థితి ఎదురవుతోంది. టిఆర్ఎస్ తో పొత్తు పెట్టుకుందామని అనుకుంటే ఆ పార్టీ అందుకు సిద్దంగా లేదు. దాంతో కొంత నిరుత్సాహానికి గురి అయింది.ఆ మీదట టిఆర్ఎస్ పై నారాయణ మండిపడ్డారు. కాగా టిడిపితో పొత్తు పెట్టుకునే విషయంలో ఒక అడుగు ముందుకు వేసినట్లు కనిపిస్తుంది.కాకపోతే ఇప్పుడే ఆ విషయం ప్రకటించకుండా ఎన్నికల సమయంలోనే పొత్తులు ఉంటాయని నారాయణ కూడా అన్నారు.అయితే ఎందుకైనా మంచిదని పొత్తులకు , పార్టీల విధానాలకు సంబందం లేదని సిపిఐ నేతలు సూత్రీకరిస్తున్నారు.
హైదరాబాద్: వెన్నుపోట్లు, కుట్రలు, కుతంత్రాలకు కేరాఫ్ అడ్రస్ అయిన టీడీపీ అధినేత చంద్రబాబునాయుడు ఢిల్లీలోని కాంగ్రెస్ పెద్దల సూచన మేరకు కొత్త డ్రామాలు చేస్తున్నారని వైఎస్సార్ కాంగ్రెస్ ఎమ్మెల్యే గడికోట శ్రీకాంత్రెడ్డి దుయ్యబట్టారు. ఇటీవలి కాలంలో బాబు రెండు పర్యాయాలు ఢిల్లీ పర్యటన చేసిన తరువాతే.. వివాదాస్పద 26 జీవోలకు సంబంధించి ఆరోపణలు ఎదుర్కొంటున్న మంత్రుల విషయంలో కొత్త పంథాలో ముందుకెళుతున్నారని ఆయన చెప్పారు. మంత్రి ధర్మానపై చార్జిషీట్ వేసి ఏడాది కావొస్తున్నదని, ఇన్నాళ్లూ మౌనంగా ఉన్న చంద్రబాబుకు ఇప్పుడు ఢిల్లీ వెళ్లిరాగానే అకస్మాత్తుగా గవర్నర్, రాష్ట్రపతిని కలవాలనే ఆలోచన తట్టిందని ఆయన ఎద్దేవా చేశారు. శ్రీకాంత్రెడ్డి శనివారం పార్టీ కేంద్ర కార్యాలయంలో విలేకరుల సమావేశంలో మాట్లాడారు. రాష్ట్రంలో అభివృద్ధి కుంటుపడుతున్నా, సంక్షేమ పథకాలకు తూట్లు పొడుస్తున్నా, ప్రజలపై పెనుభారం మోపుతున్నా ఏనాడూ స్పందించని చంద్రబాబు.. కుట్రలు, కుతంత్రాలే ఎజెండాగా ముందుకెళుతున్నారని ధ్వజమెత్తారు. 
